Nadia Erostarbe Basque Teameko surflariak historia egiten jarraitzen du, Snapper Rocksen hirugarren amaituta eta Munduko top 10ean sartuta
Aritz Aranburuk Championship Tourrean egindako balentria berdindu du horrela, zarauztarra ere finalerdietara heldu baitzen 2009-2010 denboraldian Teahupooko proban
Nadia Erostarbe etengabe ari da eboluzionatzen, kirolean hazten. Hasieratik bere surfa ikaragarria zen, bere originaltasun bereziarekin eta kalitate zigiluarekin. Beti izan da makila magikoak, berezitasunak, talentuak jotako surflaria, eta urteen poderioz erakusten ari da jende askok hasieran ikusten zuen dohain horrek hor jarraitzen duela, azaleratzen dela eta mugak hausten dituela. Joko batzuetarako sailkatu zen lehen euskal surflaria izan zen, eta CTra, munduko zirkuitu gorenera, iritsi zen lehen euskal emakumea.
Aritz Aranburu ere bitan sailkatu zen Championship Tourrean lehiatzeko, eta 2009/2010 denboraldian finalerdietara iritsi zen, Kelly Slater bera, hamaika aldiz Munduko txapeldun izandakoa, Teahupoon gaindituz.
Nadia Erostarbek asteburuan Australiako uretan egin duena ez da kirol emaitza hutsa, jada Munduko surfaren elitean dagoen norbaiten asmoen adierazpena baizik.
CTko lehen txapelketek sentsazio oso positiboak izan dituzte Nadiarentzat, iazkoarekin alderatuta, wildcard bezala txapelketa batzuetan lehiatzeko aukera izan zuenean.
Iaz Nadiak sentitzen zuen ez zela Tourrekoa, ez zuela merezi han egotea eta zorionez bakarrik sartu zela. Denboraldi honetan, ordea, oso bestelako sentsazioa duela adierazi du, bere surfingarekin seguru sentitzen da, sasoi fisiko eta mental onean dago eta, beraz, konfiantza dezente igo zaio. Garrantzi handiagoa ematen ari zaio gimnasioari eta errekuperazioari, eta horrek lagundu egiten dio.
Aurten CTn jokatutako lehen proban, Rip Curl Pro Bells Beach-en, bederatzigarren izan zen, eta bigarrenean, Western Australia Margaret River-en, hamazazpigarren. Hala ere, Erostarbek, Guillermo Gutierrez entrenatzailearekin batera, lasaitasunari eusten jakin du, eta surfean eta bere aukeretan sinesten jarraitu du. Gold Coasten, Queenslanden, baieztatu dute CTra iritsi dela, hor geratzeko.
Gipuzkoarrak eskalada meteorikoa bete du eta finalerdietan sartu da, zirkuituko zaharrenek sinatuko luketen olatuen irakurketa eta lasaitasun-erakustaldiaren ostean.
Lehen txandan Nadiak 15.16ko puntuazioa lortu zuen, 13.17 puntu pilatu zituen Alyssa Spencer estatubatuarra gaindituz. Bigarrenean Caroline Marks estatubatuarra izan zuen aurkari, Munduko txapelduna 2023an eta urre olinpikoa. 14.67 puntuek, Marksen 13.93 puntuekiko, final-laurdenetarako txartela eman zioten zarauztarrari. Baina onena final-laurdenetara iristean gertatu zen, Gabriela Bryanen aurka, une horretan Munduko lehenaren aurka. Erostarbek perfekzioa ukitu zuen. 8,67ko olatu batekin, jardunaldiko notarik altuenarekin, bere surfingak epaileek hainbeste baloratzen duten agresibitate eta kontrol puntu hori duela erakutsi zuen. 15,67 punturekin txapelketako azken-aurreko borrokara iritsi zen.
Finalerdietan Stephanie Gilmore zuen zain. Nadiaren ibilbidea zortzi aldiz Munduko txapeldun izan den surflari handiak moztu du, bi urtez CTtik urrun egon ondoren. Txanda galdu duen arren, Basque Teamekoak serieko olaturik onena sinatu du 8,50eko emaitzarekin, baina gero ezin izan du jokaldia beste olatu on batekin osatu (5,73). Gilmorek 8 eta 7 puntuko olatuekin (15 puntu guztira) Erostarbe menderatu du eta gero ere garaile izan da Luana Silvaren aurkako finalean ere, Gold Coasten bere zazpigarren garaipena lortuz eta bere ibilbideko 34.a.
Erostarberentzat emaitzak denboraldi historikoaren hasiera baieztatzen du. Gipuzkoarra podiumera igotzeaz gain, sailkapen nagusian Top10ean sartu da. Bere backhand-a, zehatza eta bertikala, ekitaldiaren sentsazio handienetako bat izan da. |
